Ma’lumki, “Bunyodkor” Superliganing 15-turi doirasida o‘z maydonida “Qizilqum” jamoasini qabul qiladi.

Ayni kunlarda “Bunyodkor” stadioni chimini to‘liq yangilash ishlari olib borilmoqda. Shu sababli jamoa uy uchrashuvlarini boshqa o‘yingohda o‘tkazadi.

“Qizilqum”ga qarshi o‘yin Olmaliqdagi OKMK sport majmuasida o‘tkazilishi mumkin edi, biroq shu kuni AGMK Superliga doirasida “Lokomotiv” bilan kuch sinashadi. “Paxtakor” 15-turni safarda o‘tkazsada, markaziy stadionda Oliy o‘quv yurtlariga kirish uchun davlat imtixonlari o‘tkazilishi tufayli bu imkonsiz.

11 avgust kuni “Qo‘qon-1912”ni qabul qiladigan “Olimpik”ning uy o‘yingohi hisoblangan “Jar”da ketma-ket ikki kun uchrashuv o‘tkazish maydonning chimiga salbiy ta’sir qilishi tabiiy.

Shu bois “Bunyodkor” - “Qizilqum” bellashuvi “Lokomotiv” stadionida bo‘lib o‘tadi. Bu masala bo‘yicha “temiryo‘lchilar” va musobaqa o‘tkazuvchi tashkilot O‘zbekiston Professional ligasi bilan kelishuvga erishilindi va tomonlarning roziligi olindi.

Demak, 10 avgust kuni “Bunyodkor” – “Qizilqum” uchrashuvi “Lokomotiv” stadionida bo‘lib o‘tadi.