"Real Madrid" klubi 2022 yilgi klublar o‘rtasidagi jahon chempionatini o‘tkazish rejasi haqida ma’lumotga ega emas, deb xabar beradi AS.

Manbaning xabariga ko‘ra, turnir sanalari aniqlanmagani sababli Madrid klubi mavsumni rejalashtirishda muammolarga duch kelgan.

Ta’kidlanishicha, tashkiliy qiyinchiliklar 2022/23 yilgi mavsumning yuklangan taqvimi bilan bog‘liq.

"Real Madrid" fitnes murabbiyi Antonio Pintus jamoaning klublar o‘rtasidagi jahon chempionati o‘tkazilishi rejalashtirilgan Xitoyga qachon borishini oldindan bilishi kerak. Joriy mavsumda futbolchilarga yukni taqsimlashga to‘g‘ri yondashish kerak, chunki Madrid klubining aksariyat o‘yinchilari JCH-2022da o‘ynaydi, 2023 yilning yanvarida esa klub Ispaniya Superkubogi uchun Saudiya Arabistoniga boradi.

Madrid klubi klublar o‘rtasidagi jahon chempionati oldingi ikki mavsumdagidek fevral oyida bo‘lib o‘tadi deb o‘ylashmoqda. Ammo muammo ham shundan iboratki, Osiyo chempionlar ligasi g‘olibi fevral oyi oxirigacha ma’lum bo‘lmaydi.