13 avgust kuni Rossiyaning Pushkin shahrida "Paxtakor-79" marhum a’zolari sharafiga bahs bo‘lib o‘tadi.
Unda "Paxtakor" hamda "Zenit" faxriy futbolchilari maydonga chiqishadi. O‘yin Rossiya Federasiyasi Sport vazirligi, Sankt-Peterburg hukumati ko‘magi bilan Yuriy Berestovning "Ayra" texnoparki, Marat Kabayev boshchiligidagi Xalqaro Islom biznesi assosiasiyasi tomonidan tashkil qilinmoqda.
Maxsus o‘yinda afsonaviy Rinat Dasayev, "Zenit" faxriylari – Dmitriy Radchenko, Aleksandr Spivak, Yuriy Jeludkov, Boris Chuxlov, "Paxtakor" faxriylari – Anatoliy Solovyov, Andrey Pyatniskiy, Aleksandr Tixonov va boshqalar qatnashishadi.
Shuningdek, o‘zbek futboli fidoyilari, halok bo‘lgan "Paxtakor-79" jamoasi a’zolari oilalari va yaqinlari uchrashuv mehmoni bo‘lishadi. O‘yin Toshkent vaqti bilan soat 16:00da (mahalliy vaqt 14:00) Pushkin shahrida joylashgan «Sarskoye selo» stadionida boshlanadi.
