Hujumchi Leu Baptistan Ispaniya chempionatiga qaytdi. "Almeriya" 29 yoshli braziliyalik bilan 4 yillik shartnoma imzolaganini e’lon qildi.
2021 yilning avgustidan beri Baptistan o‘z vatanida "Santos" safida to‘p tepayotgan edi. Braziliya klubi safida u 38 ta o‘yin o‘tkazib, 7 ta gol urdi va 2 ta golli uzatmani amalga oshirdi.
Baptistan avvalroq Ispaniyada “Espanyol”, “Rayo Valyekano”, “Vilyarreal”, “Betis” va “Atletiko” klublarida o‘ynagan. U La Liganing 178 ta uchrashuvida 34 ta gol va 23 ta golli uzatmani amalga oshirgan.
Transfermarkt portali braziliyalik hujumchining narxini 1,5 million yevroga baholamoqda.