"Manchester Yunayted" va "Yuventus" yarim himoyachisi Adriyen Rabyo o‘rtasidagi muzokaralar to‘xtab qoldi. Britaniyaning Daily Mail nashri xabariga ko‘ra, bunga futbolchi vakillarining maosh borasidagi ortiqcha talablari sabab bo‘lgan.
Jurnalistlarning yozishicha, o‘g‘lining manfaatlarini himoya qiluvchi futbolchining onasi Veronika Rabyo mankunianliklar rahbariyatidan hozirda "Yuventus"da olayotgan yillik taxminan 7 million yevro maosh so‘ragan. “Qizil iblislar” vakillari talablarni o‘ta yuqori deb hisoblashdi va ayni damda muzokaralar noaniq holatda. Qayd etilishicha, klublarning o‘zlari bir necha kun avval taxminan 17,7 million yevrolik futbolchi transferi bo‘yicha kelishuvga erishgan.
27 yoshli Rabyo faoliyatini “Manchester Siti” akademiyasida boshlagan. 2010 yildan 2019 yilgacha Adriyen "PSJ" tarkibida bo‘lib, 227 o‘yinda 24 gol urdi va 14 golga assistentlik qildi. Uch yil oldin u turinliklar bilan erkin agent maqomida 2023 yilgacha mo‘ljallangan shartnoma imzoladi.
