"Манчестер Юнайтед" ва "Ювентус" ярим ҳимоячиси Адриен Рабьо ўртасидаги музокаралар тўхтаб қолди. Британиянинг Daily Mail нашри хабарига кўра, бунга футболчи вакилларининг маош борасидаги ортиқча талаблари сабаб бўлган.
Журналистларнинг ёзишича, ўғлининг манфаатларини ҳимоя қилувчи футболчининг онаси Вероника Рабьо манкунианликлар раҳбариятидан ҳозирда "Ювентус"да олаётган йиллик тахминан 7 миллион евро маош сўраган. “Қизил иблислар” вакиллари талабларни ўта юқори деб ҳисоблашди ва айни дамда музокаралар ноаниқ ҳолатда. Қайд этилишича, клубларнинг ўзлари бир неча кун аввал тахминан 17,7 миллион евролик футболчи трансфери бўйича келишувга эришган.
27 ёшли Рабьо фаолиятини “Манчестер Сити” академиясида бошлаган. 2010 йилдан 2019 йилгача Адриен "ПСЖ" таркибида бўлиб, 227 ўйинда 24 гол урди ва 14 голга ассистентлик қилди. Уч йил олдин у туринликлар билан эркин агент мақомида 2023 йилгача мўлжалланган шартнома имзолади.
