Italiya terma jamoasi hujumchisi Jakomo Raspadori "Sassuolo"dan "Napoli"ga o‘tadi. Jurnalist Janluka Di Marsio o‘z saytida xabar berishicha, klublar ijara shartlarini kelishib olishdi.
Manbaga ko‘ra, "Napoli" 22 yoshli italiyalikning ijarasi uchun 5 million yevro to‘laydi. Shartnoma futbolchining huquqlarini 25 million yevroga sotib olish majburiyatini o‘z ichiga oladi. Yana 5 million yevro bonus sifatida to‘lanishi mumkin.
Futbolchining amaldagi shartnomasi 2024 yilgacha mo‘ljallangan. Transfermarkt portali futbolchining narxini 28 million yevroga baholamoqda.
O‘tgan mavsumda Raspadori barcha musobaqalarda 38 ta o‘yinda maydonga tushib, 10 ta gol urdi va 6 ta golga assistentlik qildi.
