"Napoli" "Verona" hujumchisi Jovanni Simeone bilan shartnoma imzolaganini e’lon qildi.

Neapolliklar 27 yoshli argentinalik futbolchini 2022/23 yilgi mavsum oxirigacha ijaraga olishdi, agar futbolchi jamoada o‘ynab, ma’lum ko‘rsatkichlarga erishsa, futbolchini sotib olish majburiyga aylanadi.

Jurnalist Fabrisio Romanoning xabariga ko‘ra, "Napoli" forvardning ijarasi uchun 3,5 million yevro to‘laydi, sotib olish bandida ko‘rsatilgan summa 12 million yevroni tashkil qiladi.

Simeone o‘tgan mavsumda "Verona" tarkibida 35 o‘yinda 17 ta gol urdi va 6 ta golli uzatmani amalga oshirdi. Transfermarkt.com portali hujumchining narxini 17 million yevroga baholamoqda.

Jovanni Simeone Argentina, “Inter” va “Lasio”ning sobiq hujumchisi, hozirda “Atletiko” bosh murabbiyi Diyego Simeonening o‘g‘li hisoblanadi.