"MYU"ning bugungi egalari bo‘lgan Gleyzerlar oilasi klubning ayrim aksiyalarini sotishi haqida xabarlar tarqalgandi. Ammo hozir butunboshli jamoani sotib olishga da’vogar shaxs paydo bo‘lgan. Uning ismi Jim Retkliffdir. Jim Buyuk Britaniyadagi eng katta biznesmenlar qatoriga kiradi. Manbalarga ko‘ra, u 11 milliard funtga egalik qiladi. Agarda Gleyzerlar xohlasa, Retkliff jami qiymati 5 millard funtlik klubni sotib olib, "to‘liq nazorat"ni o‘z qo‘liga olishi mumkin. Bu haqida biznesmenning matbuot kotibi shunday deydi:
"Agarda bu klub sotiladigan bo‘lsa, Jim uni sotib olishga tayyor. Rahbariyat rozi bo‘lsa, biz hoziroq muzokaralar o‘tkazib, klubni uzoq vaqtlik egasiga aylanishimiz mumkin. Gap bu yerda sarflanadigan pul haqida ketayotgani yo‘q. Gap qadriyatlar haqida ketmoqda".
Ushbu holatga "MYU"ning sobiq yulduzi Anderson ham munosabat bildirdi. U shunday deydi: "Ser Jim shu yerlik odam. Uning klubga qancha pul sarflashi ahamiyatsiz. Muhimi, u "MYU"ning yuragini, muxlislar tilagini yaxshi biladi. Ser Jim bu klubning muxlisi. Shu sababli men uni yangi egaga aylanishini istayman. Gleyzerlarning klubda qiladigan ishi qolmadi. Ular ketishi kerak. Ishonchim komilki, dunyodagi millionlab "Manchester Yunayted" muxlislari ham shuni istashadi".
O‘tmishda klubning direktori bo‘lib ishlagan Maykl Nayton ham vaziyatga o‘z bahosini berdi. U shunday deydi: "Gleyzerlar xonadoni "MYU"ning global brendiga zarar yetkazdi. Mening ularga shaxsiy adovatim yo‘q. Ammo ular qo‘llayotgan model xatodir. Oxirgi paytlarda ular klubga katta mablag‘ ajratmay qo‘ydi. Buni "MYU"ning transfer bozoridagi holatidan ham ko‘rishimiz mumkin. Qolaversa, "Old Trafford"ning ham hozirgi ahvoliga havas qilib bo‘lmaydi".
Hafta boshida Gleyzerlar 2005 yildan buyon "MYU" transferlariga jami 1,1 milliard funt sarflagani ma’lum bo‘lgan edi. Ayni damda esa klubning qarzlari ham ancha ko‘payib qolgan. Ayrim manbalarda uning qiymati 627 million funt ekani aytiladi. "Manchester Yunayted" yangi mavsumning dastlabki ikkita uchrashuvini boy bergandi. Hozir esa ular jadvalning quyi pog‘onasida turibdi. Ko‘ramiz, voqealar rivoji qanday ko‘rinish olarkin. Jim Redkliffga esa bu borada omad tilaymiz. Agarda u "MYU"ni sotib olishni uddalasa, jamoada qaytadan qurish ishlari boshlanishi aniq. Harxolda, hozirgi muammolarning tag zamirida haqiqatdan ham Gleyzerlar yotgan bo‘lsa, qayta qurish hammasini o‘zgartirishi mumkin.
ISMATOV J.
