"Tottenxem"ning yangi a’zosi Ivan Perishich "Vulverxempton"ga qarshi Angliya Premyer-ligasining 3-turi doirasida bo‘lib o‘tadigan o‘yining asosiy tarkibidan joy oldi va yangi jamoasining asosiy tarkibdagi debyut uchrashuvini o‘tkazadi.
Risharlison, Bissum va Langle kabi yangi kelgan futbolchilar esa zaxirada qolishdi. Jamoaga shu yilning yozida kelib qo‘shilgan Ivan Perishich "Tottenxem"ning avvalgi o‘yinlarida zaxiradan maydonga tushgandi.
Eslatib o‘tamiz, dastlabki ikki turda "Tottenxem" "Chelsi" va "Sautgempton" bilan o‘yinda to‘rt ochko olgan edi. "Shporlar" bosh murabbiyi Antonio Konte "Chelsi"ga qarshi o‘yindan so‘ng qizil kartochka olgani uchun bugungi uchrashuvda zaxira o‘rindig‘idan joy olmaydi.
