Devid Bekxemning «abadiy» latofatli turmush o‘rtog‘i Viktoriya Adams xonim yana mojaro markazida.

Amerikaning Page Six sayti xabariga qaraganda, Angliya milliy jamoasi sobiq yarim himoyachisi hamxonasi to‘ng‘ich o‘g‘li - Bruklinning mahbubasi Nikola Pelts bilan sira kelisholmayapti. Ularning o‘rtasida allaqachon «sovuq urush» boshlangan...

Aytishlaricha, ikki xonim o‘zaro gaplashmaydi, bir-biriga sira toqat ham qilolmaydi. O‘rtadagi mojaro aprel oyi, ya’ni Bruklin va Nikolaning to‘yidan buyon davom etmoqda. Boyligi 1,4 milliard dollarga baholangan mashhur milliarderning  qizi - Nikola Pelts 27 yoshli aktrisa, «Transformerlar» filmlari yulduzi. Bruklin Jozef Bekxem esa 23 yoshda. Uning model va moda dizayneri yo‘nalishini tanlaganida Viktoriya xonimning ta’siri bor, albatta. Har holda, mashhur sobiq xonanda futbolga nisbatan moda olamiga ko‘proq qiziqadi.

Qiziq, mojaro asosi nima? Gap shundaki, Nikola bo‘lajak qaynonasining to‘yni rejalashtirish ishlarida qatnashishini xohlamagandi. Tabiiyki, bu Spice Girls guruhi sobiq xonandasiga aslo yoqmadi. Peltsga esa Viktoriyaning Bruklinga haddan ortiq e’tibor beraverishi ma’qul emas. Nikola ehtimolki, Viktoriyaning mashhurligiga ham hasad qilar... Shuningdek, oilaviy munosabatlarga Britaniyaning Tatler jurnali muqovasiga chiqarilgan Nikolaning surati va sarlavha ta’sir qilgan bo‘lishi mumkin: «Yangi Bekxem xonim». OAVda yozilishicha, Viktoriya shundan so‘ng o‘g‘li bilan ham gaplashmay qo‘ygan...

Matbuotdagi shov-shuvlar Pelts xonimning hissiy holatini yuzaga chiqardi. U juma kuni ijtimoiy tarmoqqa ko‘z yoshlari bilan «yuvilgan» suratini qo‘yib, qisqacha izoh yozdi: «Hammada odamlar tufayli o‘zini yomon his qiladigan kunlar bo‘ladi va bunda yig‘lab olishingiz tabiiy hol». Bruklin Bekxem esa darhol mahbubasini qo‘llab-quvvatladi: «Ajoyib qalb egasisan va seni shundayliging uchun sevaman». Viktoriya esa hozircha uning qalbini bilolmayapti, chog‘i…