"Rubin" klubi sobiq futbolchisi hamda "Neftchi" va "Lokomotiv" klublari sobiq bosh murabbiyi Andrey Fyodorov "Biznes Onlayn" nashriga bergan intervyusida Eldor Shomurodov va Oston O‘runov haqida to‘xtalib o‘tdi.

— Vatandoshlaringiz Eldor Shomurodov va Oston O‘runov haqida nima deya olasiz?
— Shomurodov men uchun o‘z mehnatlari evaziga muvaffaqiyatga erishgan futbolchi hisoblanadi. U o‘smirlik paytida yetuk futbolchi bo‘lishi mumkinligi haqida taxminlar yo‘q edi. Ammo uning yaxshi xislati bor — eshitishni biladi. Eldor to‘g‘ri murabbiylar qo‘liga tushdi va ular futbolchining kuchli tomonlaridan maksimal foydalanishdi. Umuman olganda, u futbolni qanot o‘yinchisi sifatida boshlagan. Uning tezligi yaxshi edi, ammo qisqa masofalarda to‘p bilan ishlash mahoratiga ega emasdi. Unga keng hudud kerak edi. Karpin esa undan markaziy hujumchi sifatida foydalanishga majbur bo‘ldi. Chunki jamoada boshqa hujumchilar yo‘q edi. U esa hujumchi sifatida o‘zini ko‘rsatdi va Italiyaga yo‘l oldi.

— Shomurodovning ishlari hozirda yaxshi emas va u «Roma»ni tark etishi mumkin.
— Uning raqobatchilari kimlar ekaniga ahamiyat qaratish kerak. "Roma" hozirda Italiya terma jamoasi forvardi Andrea Belottini o‘z safiga qo‘shib olmoqchi. Demak, Mourinyo Shomurodovga ishonch bildirmayapti.

— Italiyada qolgani ma’qulmi?
— Agar takliflar bo‘lsa, unda qolgani yaxshi, albatta.

— O‘runov o‘z iqtidorini namoyish etishi uchun unga nima yetishmayapti?
— Aynan Shomurodovda bo‘lgan xislat — tinglay olish yetishmayapti. Oston eplaganicha o‘ynayapti. Uni O‘zbekiston chempionatidagi o‘yinlarini yaxshi eslayman. Nazarimda, u kayfiyat futbolchisi va o‘zi istagandek o‘ynashga intiladi.