Bugun ayollar klublari o‘rtasidagi Osiyo chempionati G‘arb mintaqasida g‘olib jamoa nomi aniq bo‘ldi. Unda yurtimiz sharafini himoya qiladigan “So‘g‘diyona-W” Eronning “Bam Xatun” klubiga qarshi ikkinchi o‘yinni o‘tkazib, kichik hisobda g‘alaba qozondi.

Uchrashuvning 31-daqiqasida Diyora Habibullayevaning tovon bilan bergan uzatmasidan so‘ng to‘p Qurbonovaga borib tushdi. Shahnoza to‘pni darvozabonning ustidan oshirib, hisobni ochdi.

Ikkinchi bo‘limda jizzaxliklar raqib darvozasini ishg‘ol qilish uchun yana bir nechta imkoniyatlarga ega bo‘ldi. Jumladan, 65-daqiqada Habibullayeva penaltidan unumli foydalana olmagan bo‘lsa, o‘yin yakunlanashiga yaqin Diyoraning o‘zi darvozabon bilan yakkama-yakka vaziyatga chiqib, aniq zarba bera olmadi.

Eronliklar ham darvozamiz oldida xavfli vaziyatlarni yaratishdi. Himoyachilar va darvozabonning sa’y-harakatlari evaziga darvoza daxlsizligi saqlanib qolindi.

Shu tariqa, "So‘g‘diyona-W" ayollar klublari o‘rtasidagi Osiyo chempionati finaliga chiqdi. Finalda jamoamiz Tailandning "College of Asian Scholars" jamoasiga qarshi o‘ynaydi. Final 22 oktyabr kuni bo‘lib o‘tadi.

Ayollar futbol klublari o‘rtasida OCH. G‘arb mintaqasi. Ikkinchi o‘yin
"So‘g‘diyona-W" - "Bam Xatun" - 1:0 (1:0)
Gol: Shahnoza Qurbonova (31)
"So‘g‘diyona-W": 1. Kumushoy G‘ulomova, 5. Nafisa Nabiqulova, 6. Iroda Turdaliyeva, 7. Nozima Komoltoyeva, 15. Shahnoza Qurbonova, 19. Ushijima Riko, 21. Xolida Dadaboyeva (C),  22. Ana Cheminava, 23. Diyora Habibullayeva, 27. Feruza Bobohujayeva, 77. Zarina Mamatkarimova.
"Bam Xatun": 54. Zahro Xajaviy,  3. Kavsar Kamoliy, 6. Zahro Sarbaliy, 7. Fotima Geraeli, 8. Behnaz Tohirxoniy, 9. Zahro G‘anbariy, 10. Atefeh Ramezanizoda (C), 11. Samina Chahkandiy, 15. Negin Zandiy, 17. Shahnaz Jafariy Zoda. 23 Mona Hamoudiy.