Бугун аёллар клублари ўртасидаги Осиё чемпионати Ғарб минтақасида ғолиб жамоа номи аниқ бўлди. Унда юртимиз шарафини ҳимоя қиладиган “Сўғдиёна-W” Эроннинг “Бам Хатун” клубига қарши иккинчи ўйинни ўтказиб, кичик ҳисобда ғалаба қозонди.

Учрашувнинг 31-дақиқасида Диёра Ҳабибуллаеванинг товон билан берган узатмасидан сўнг тўп Қурбоновага бориб тушди. Шаҳноза тўпни дарвозабоннинг устидан ошириб, ҳисобни очди.

Иккинчи бўлимда жиззахликлар рақиб дарвозасини ишғол қилиш учун яна бир нечта имкониятларга эга бўлди. Жумладан, 65-дақиқада Ҳабибуллаева пенальтидан унумли фойдалана олмаган бўлса, ўйин якунланашига яқин Диёранинг ўзи дарвозабон билан яккама-якка вазиятга чиқиб, аниқ зарба бера олмади.

Эронликлар ҳам дарвозамиз олдида хавфли вазиятларни яратишди. Ҳимоячилар ва дарвозабоннинг саъй-ҳаракатлари эвазига дарвоза дахлсизлиги сақланиб қолинди.

Шу тариқа, "Сўғдиёна-W" аёллар клублари ўртасидаги Осиё чемпионати финалига чиқди. Финалда жамоамиз Таиланднинг "College of Asian Scholars" жамоасига қарши ўйнайди. Финал 22 октябрь куни бўлиб ўтади.

Аёллар футбол клублари ўртасида ОЧ. Ғарб минтақаси. Иккинчи ўйин
"Сўғдиёна-W" - "Бам Хатун" - 1:0 (1:0)
Гол: Шаҳноза Қурбонова (31)
"Сўғдиёна-W": 1. Кумушой Ғуломова, 5. Нафиса Набиқулова, 6. Ирода Турдалиева, 7. Нозима Комолтоева, 15. Шаҳноза Қурбонова, 19. Ушижима Рико, 21. Холида Дадабоева (C),  22. Ана Чеминава, 23. Диёра Ҳабибуллаева, 27. Феруза Бобоҳужаева, 77. Зарина Маматкаримова.
"Бам Хатун": 54. Заҳро Хажавий,  3. Кавсар Камолий, 6. Заҳро Сарбалий, 7. Фотима Гераэли, 8. Беҳназ Тоҳирхоний, 9. Заҳро Ғанбарий, 10. Атефеҳ Рамезанизода (C), 11. Самина Чаҳкандий, 15. Негин Зандий, 17. Шаҳназ Жафарий Зода. 23 Мона Ҳамоудий.