"Manchester Siti" APLning 4-turi doirasidagi o‘yinda "Kristal Pelas" ustidan irodali g‘alabaga erishdi. Unda “shaharliklar” 4:2 hisobida g‘alaba qozonishdi.

“Siti” birinchi bo‘limdan keyin 0:2 hisobida mag‘lub bo‘layotgan edi. Dastlab himoyachi Jon Stouns o‘z darvozasiga gol urdi. Keyin esa raqib himoyachisi Yoaxim Andersen mehmonlar ustunligini oshirdi.

Biroq ikkinchi bo‘limda Xosep Gvardiola shogirdlari uchrashuvning to‘lqinini o‘zgartirib, raqibga bosim o‘tkazishdi. Birinchi golni yarim himoyachi Bernardu Silva kiritgan bo‘lsa, keyinroq hujumchi Erlin Xoland xet-trik qayd etdi.

"Siti" 10 ochko bilan turnir jadvalida peshqadamlik qilmoqda. “Kristal Pelas” 4 ochko bilan 13-o‘ringa tushib ketdi.