"Манчестер Сити" АПЛнинг 4-тури доирасидаги ўйинда "Кристал Пэлас" устидан иродали ғалабага эришди. Унда “шаҳарликлар” 4:2 ҳисобида ғалаба қозонишди.

“Сити” биринчи бўлимдан кейин 0:2 ҳисобида мағлуб бўлаётган эди. Дастлаб ҳимоячи Жон Стоунс ўз дарвозасига гол урди. Кейин эса рақиб ҳимоячиси Йоахим Андерсен меҳмонлар устунлигини оширди.

Бироқ иккинчи бўлимда Хосеп Гвардиола шогирдлари учрашувнинг тўлқинини ўзгартириб, рақибга босим ўтказишди. Биринчи голни ярим ҳимоячи Бернарду Силва киритган бўлса, кейинроқ ҳужумчи Эрлин Холанд хет-трик қайд этди.

"Сити" 10 очко билан турнир жадвалида пешқадамлик қилмоқда. “Кристал Пэлас” 4 очко билан 13-ўринга тушиб кетди.