O‘zbekiston Superligasi 17-turidan o‘rin olgan, “Yil o‘yini” deya e’tirof etilayotgan “Navbahor” – “Paxtakor” o‘rtasidagi uchrashuv arafasida “lochinlar”ning 29 yoshli tajribali himoyachisi Davronbek Hoshimov bo‘lajak o‘yin haqidagi fikrlari bilan o‘rtoqlashdi.

- Jamoamizning “Paxtakor”ga qarshi kechadigan bahslari doimo shiddatli va keskin kurashlar ostida kechgan. Bu safargi o‘yin esa oldingilaridan ham ko‘ra, qiziqarliroq hamda tomoshabop o‘tishi aniq. Boisi, ayni paytda “Navbahor” turnir jadvali peshqadami bo‘lsa, “Paxtakor” amaldagi chempion hisoblanadi.       

Shuning uchun bo‘lajak bellashuv “Yil o‘yini” deya e’tirof etilmoqda hamda ushbu bahsga qiziqish o‘ta yuqori. Biz – futbolchilar ham mazkur o‘yinning qanday ahamiyatga ega ekanligini tushunib turibmiz va bo‘lajak bellashuvda g‘alaba qozonish, muxlislarga quvonch ulashish, peshqadamlikni yanada mustahkamlashga intilamiz va buni amalga oshirish uchun barcha imkoniyatimizni ishga solamiz. Faqat buning uchun ishqibozlardan jamoamizni bevosita stadionda munosib tarzda qo‘llab-quvvatlab, g‘alabamizga madadkor bo‘lishlarini so‘rab qolaman.  

O‘z navbatida yana shuni ham ta’kidlamoqchimanki, qur’a natijasiga ko‘ra, “sherlar” bilan 2 sentyabr kuni O‘zbekiston kubogining chorak finalidan o‘rin olgan bahsda yana Namanganda to‘qnash kelamiz.

Shu bois, 28 avgust oqshomidagi o‘yinda zafar quchsak, kubok bahsida ko‘tarinki kayfiyatda maydonga tushamiz.              

Fursatdan foydalanib, bizga barcha sharoitlarni yaratib berayotgan Namangan viloyati hokimi Shavkat Shokirjanovich Abdurazzoqov, shuningdek, “Navbahor” PFK rahbariyati, jumladan, klub prezidenti Otabek Arifovich Samatovga jamoamiz nomidan o‘z minnatdorchiligimni bildiraman.

Jamoamiz joriy mavsumda o‘z oldiga qo‘ygan yuksak maqsad, ya’ni, Osiyo Chempionlar Ligasi yo‘llanmasini qo‘lga kiritish uchun oxirigacha kurash olib boradi hamda buni amalga oshirish uchun biz – futbolchilar qo‘ldan kelganicha harakat qilamiz.