Bilasiz, yurtimiz 2023 yilning mart oyida 20 yoshgacha bo‘lgan futbolchilar o‘rtasidagi Osiyo kubogiga mezbonlik qiladi. Unda Osiyoning eng kuchli jamoalari qit’a birinchiligi va Jahon chempionati yo‘llanmasi uchun kurash olib boradi.  

O‘z o‘rnida, O‘zbekiston U-20 terma jamoasi ham mezbon sifatida mazkur musobaqaga tayyorgarlikni boshlab yuborgan. Jamoamiz rejaga muvofiq musobaqaga qadar bir nechta yig‘inlar o‘tkazishi, xalqaro o‘rtoqlik uchrashuvlarida ishtirok etishi rejalashtirilgan.

Joriy yilning 10-18-centyabr kunlari Saudiya Arabistonida U-20 Osiyo kubogiga saralash o‘yinlari bo‘lib o‘tadi. Vakillarimiz Saudiya Arabistoni, Xitoy, Myanma va Maldiv yoshlar terma jamoalari bilan bir guruhdan joy olgan bo‘lib, jamoamizning bu bosqichdagi ishtiroki norasmiy hisoblanadi.

Ravshan Haydarov boshqaruvidagi O‘zbekiston U-20 terma jamoasi 7-11-sentyabr kunlari xalqaro turnir doirasida Urugvay, Argentina va Braziliya yoshlar terma jamoalariga qarshi maydonga tushadi. Shuningdek, jamoa 24-27-sentyabr kunlari Toshkentda Jahon chempionati ishtirokchisi — Slovakiya yoshlar terma jamoasiga o‘rtoqlik o‘yinlarida qatnashadi.

Shu sababli Saudiya Arabistonidagi U-20 Osiyo kubogi saralash bosqichida O‘zbekiston U-19 terma jamoasining ishtirok etishi ko‘zda tutilmoqda. Bu orqali Farhod Nishonov shogirdlarining xalqaro tajribalarini yanada orttirish va ularni rasmiy uchrashuvlarga tayyorlab borish maqsad qilingan.

Dammam shahrida bo‘lib o‘tadigan yig‘indan avval O‘zbekiston U-19 terma jamoasi BAA U-19 terma jamoasi bilan o‘rtoqlik o‘yinida ishtirok etadi. Uchrashuv 6-sentyabr kuni Dubayda o‘tkazilishi rejalashtirilgan.