Биласиз, юртимиз 2023 йилнинг март ойида 20 ёшгача бўлган футболчилар ўртасидаги Осиё кубогига мезбонлик қилади. Унда Осиёнинг энг кучли жамоалари қитъа биринчилиги ва Жаҳон чемпионати йўлланмаси учун кураш олиб боради.  

Ўз ўрнида, Ўзбекистон U-20 терма жамоаси ҳам мезбон сифатида мазкур мусобақага тайёргарликни бошлаб юборган. Жамоамиз режага мувофиқ мусобақага қадар бир нечта йиғинлар ўтказиши, халқаро ўртоқлик учрашувларида иштирок этиши режалаштирилган.

Жорий йилнинг 10-18-cентябрь кунлари Саудия Арабистонида U-20 Осиё кубогига саралаш ўйинлари бўлиб ўтади. Вакилларимиз Саудия Арабистони, Хитой, Мянма ва Мальдив ёшлар терма жамоалари билан бир гуруҳдан жой олган бўлиб, жамоамизнинг бу босқичдаги иштироки норасмий ҳисобланади.

Равшан Ҳайдаров бошқарувидаги Ўзбекистон U-20 терма жамоаси 7-11-сентябрь кунлари халқаро турнир доирасида Уругвай, Аргентина ва Бразилия ёшлар терма жамоаларига қарши майдонга тушади. Шунингдек, жамоа 24-27-сентябрь кунлари Тошкентда Жаҳон чемпионати иштирокчиси — Словакия ёшлар терма жамоасига ўртоқлик ўйинларида қатнашади.

Шу сабабли Саудия Арабистонидаги U-20 Осиё кубоги саралаш босқичида Ўзбекистон U-19 терма жамоасининг иштирок этиши кўзда тутилмоқда. Бу орқали Фарҳод Нишонов шогирдларининг халқаро тажрибаларини янада орттириш ва уларни расмий учрашувларга тайёрлаб бориш мақсад қилинган.

Даммам шаҳрида бўлиб ўтадиган йиғиндан аввал Ўзбекистон U-19 терма жамоаси БАА U-19 терма жамоаси билан ўртоқлик ўйинида иштирок этади. Учрашув 6-сентябрь куни Дубайда ўтказилиши режалаштирилган.