O‘zbekiston kubogi chorak finalidan o‘rin olgan bahsda “Navbahor” o‘z maydonida Toshkentning “Paxtakor” jamoasini qabul qiladi.
Mamlakatimizning eng sovrindor klublari qatoridan joy olgan va Superliga (oliy liga)mizning muntazam ishtirokchisi bo‘lgan mazkur jamoalarning O‘zbekiston kubogi tarixidagi natijalariga nazar soladigan bo‘lsak, “Navbahor” billur sovrinni 3 marta – 1992, 1995 va 1998 yillarda qo‘lga kiritgan hamda 1993 yili final ishtirokchisiga aylanib, hal qiluvchi bahsda aynan bo‘lajak raqib “Paxtakor”ga 0:3 hisobida imkoniyatni boy bergan.
“Paxtakor” esa O‘zbekiston kubogini qo‘lga kiritish bo‘yicha rekordchi hisoblanadi. “Sherlar” 13 marta (!) billur sovrin sohibiga aylanishgan. Poytaxtliklar 1993, 1997, 2001, 2002, 2003, 2004, 2005, 2006, 2007, 2009, 2011, 2019 hamda 2020 yillarda O‘zbekiston kubogini boshlari uzra ko‘tarishgan.
Shuningdek, “Paxtakor” 1996, 2008, 2018 va 2021 yillarda O‘zbekiston kubogining finalida ishtirok etib, raqiblariga imkoniyatni boy bergan.
Ta’kidlash joizki, “Navbahor” va “Paxtakor” jamoalari O‘zbekiston kubogi doirasidagi bahslarda o‘zaro 10 marta ro‘baro‘ kelishgan.
Ushbu o‘yinlarning 1 tasida “Navbahor” g‘alaba qozongan bo‘lsa, 3 bellashuvda durang qayd etilgan va 6 ta bahsda “Paxtakor” zafar quchgan. To‘plar nisbatidagi ustunlik ham toshkentliklar tarafida – 24 – 11.
Mazkur jamoalarning O‘zbekiston kubogi doirasidagi barcha uchrashuvlari natijalari:
1993 yil. Final
“Navbahor” – “Paxtakor” – 0:3
1998 yil. Yarim final
“Paxtakor” – “Navbahor” – 1:1
“Navbahor” – “Paxtakor” – 2:0
2005 yil. Yarim final
“Navbahor” – “Paxtakor” – 4:4
“Paxtakor” – “Navbahor” – 3:1
2008 yil. 1/8 final
“Navbahor” – “Paxtakor” – 1:2
“Paxtakor” – “Navbahor” – 5:0
2009 yil. 1/8 final
“Navbahor” – “Paxtakor” – 0:3
2012 yil. 1/8 final
“Navbahor” – “Paxtakor” – 1:2
“Paxtakor” – “Navbahor” – 1:1
Eslatib o‘tamiz, “Navbahor” – “Paxtakor” uchrashuvi 2 sentyabr kuni Namangandagi “Markaziy” o‘yingohda soat 20:00 da start oladi.
