“Andijon” hamda AGMK klublari o‘rtasidagi uchrashuv jamoamiz a’zosi Zafar Polvonov uchun alohida ahamiyat kasb etadi. Negaki, bir necha yillar mobaynida olmaliqliklar safida to‘p surdi va bu yil yozgi transfer oynasida “Andijon”ga ko‘chib o‘tdi.
Tabiiyki, u sobiq jamoasini yaxshi biladi. O‘yin oldidan Polvonovning fikrlari bilan qiziqib ko‘rdik.
- Chorak finalda AGMKga qarshi to‘qnash kelishingizni kutganmisiz?
- Menimcha, hech kim buni kutmagandi. Bu lotoreya. U yerda oldin o‘ynab ketgan bo‘lsam ham kutilmagan holat bo‘ldi. Bu o‘yin. Kim yutsa o‘sha jamoa yarim finalga chiqadi.
- 2018 yili AGMK bilan O‘zbekiston Kubogini qo‘lga kiritgansiz va o‘shanda qanday xotiralar qolgan?
- 2018 yilgi xotira bir umr yodimda qolgan. O‘shanda ajoyib kun bo‘lgan. Kubokni yutib tarixga kirgandik. Bu ham bir omad-da! O‘sha paytda futbolchilarimizni tayyorgarligi ham yuqori bo‘lgandi. Yaxshi xotira qolgan.
- “Andijon” AGMKni mag‘lub etib yarim finalga chiqsa, buni sensasiyaga qiyoslash mumkinmi yoki...
- Yo‘q, buni oldindan aytish qiyin. Chunki bu futbol. Futbolni hech qachon aldab bo‘lmaydi. Har holda biz o‘z maydonimizda o‘ynaymiz. AGMK ham kuchsiz raqib emas. Shunga yarasha tayyorgarlik yaxshi bo‘lyapti. Bu – futbol. Xudo xohlasa, hammasi yaxshi bo‘ladi. Muxlislarimizni xursand qilishga harakat qilamiz." - dedi Polvonov "Andijon" klubi matbuot xizmatiga bergan intervyusida.
