“Андижон” ҳамда АГМК клублари ўртасидаги учрашув жамоамиз аъзоси Зафар Полвонов учун алоҳида аҳамият касб этади. Негаки, бир неча йиллар мобайнида олмалиқликлар сафида тўп сурди ва бу йил ёзги трансфер ойнасида “Андижон”га кўчиб ўтди.
Табиийки, у собиқ жамоасини яхши билади. Ўйин олдидан Полвоновнинг фикрлари билан қизиқиб кўрдик.
- Чорак финалда АГМКга қарши тўқнаш келишингизни кутганмисиз?
- Менимча, ҳеч ким буни кутмаганди. Бу лоторея. У ерда олдин ўйнаб кетган бўлсам ҳам кутилмаган ҳолат бўлди. Бу ўйин. Ким ютса ўша жамоа ярим финалга чиқади.
- 2018 йили АГМК билан Ўзбекистон Кубогини қўлга киритгансиз ва ўшанда қандай хотиралар қолган?
- 2018 йилги хотира бир умр ёдимда қолган. Ўшанда ажойиб кун бўлган. Кубокни ютиб тарихга киргандик. Бу ҳам бир омад-да! Ўша пайтда футболчиларимизни тайёргарлиги ҳам юқори бўлганди. Яхши хотира қолган.
- “Андижон” АГМКни мағлуб этиб ярим финалга чиқса, буни сенсацияга қиёслаш мумкинми ёки...
- Йўқ, буни олдиндан айтиш қийин. Чунки бу футбол. Футболни ҳеч қачон алдаб бўлмайди. Ҳар ҳолда биз ўз майдонимизда ўйнаймиз. АГМК ҳам кучсиз рақиб эмас. Шунга яраша тайёргарлик яхши бўляпти. Бу – футбол. Худо хоҳласа, ҳаммаси яхши бўлади. Мухлисларимизни хурсанд қилишга ҳаракат қиламиз." - деди Полвонов "Андижон" клуби матбуот хизматига берган интервьюсида.
