O‘zbekiston Coca Cola Kubogining chorak finali doirasidagi “So‘g‘diyona” – “Qizilqum” (1:1) uchrashuvidan keyingi matbuot anjumanida navoiyliklar bosh murabbiyi Nikola Lazarevich ishtirok etdi.

O‘yin haqida
— O‘yin haqida nima deyishim mumkin? 120  daqiqalik ajoyib va qiyin o‘yin bo‘ldi. Biz mana shunday bahsni kutgandik. Alamlisi, kimdir mag‘lubiyatga uchrashi kerak edi. O‘yinda kutilmagan jihati shu bo‘ldiki, “So‘g‘diyona” qarshi hujumlarga e’tibor qaratdi. Keyin o‘yin rejamizdagidek davom etdi. 120 daqiqa kurashlarga boy o‘yin bo‘ldi. G‘alaba qozongan taqdirimizda ham, bunga haqli ravishda erishgan bo‘lardik. O‘zbekiston kubogining keyingi bosqichiga yo‘llanma olishni maqsad qilgandik. Afsuski, mag‘lubiyatga uchradik. Buyog‘iga endilikda chempionat bahslariga e’tibor qaratamiz.

— Jamoangiz qo‘shimcha bo‘lim va penaltilar seriyasiga tayyorgarlik ko‘rganmidi?
— Ha, albatta, tayyorgarlik ko‘rgandik. Lekin maqsadimiz asosiy vaqtda masalani hal qilish edi. Lekin shunday bo‘lsa-da, penaltilar seriyasiga mashg‘ulotlar vaqtida tayrgarlik ko‘rgandik. Shu o‘rinda “So‘g‘diyona” jamoasini kubokning keyingi bosqichida omad yor bo‘lishini tilayman.

— Bugungi uchrashuv hakamlariga e’tirozingiz bormi?
— Bor. Lekin hakamlar ikki jamoa uchun xato qaror qabul qildi. Bu tomonlama durang deyish mumkin. Shunday bo‘lsa-da, mana shunday darajadagi uchrashuvda VAR bo‘lishi kerak edi.