Gonkongning "Istern" klubi bosh murabbiyi Roberto Losada OFK kubogi chorak final bosqichi doirasida bo‘lib o‘tgan "So‘g‘diyona"ga qarshi bo‘lib o‘tgan bahsdan so‘ng o‘z fikrini bildirdi.

"Kutganimizdek qiyin o‘yin bo‘ldi. Maqsadimiz — 90 daqiqa davomida himoyada mustahkam o‘ynab, qarshi hujumlardan foydalanish edi. Bundan boshqa ilojimiz ham yo‘q edi. Chunki zaxiramiz faqat yosh futbolchilardan iborat. Ammo o‘yin so‘ngida maqsadimiz amalga oshmay qoldi.

Ikkinchi bo‘limda "So‘g‘diyona" bosimni kamaytirdi. Shunda men qiyin vaziyatdan chiqdik, deb o‘ylay boshladim. Ammo o‘yin so‘ngida gol o‘tkazib yubordik.

Men o‘z futbolchilarim bilan, ayniqsa, himoyachilar bilan faxrlanaman. Ular "So‘g‘diyona"ga qarshi bahsda juda yaxshi harakat qilishdi. Bugungi o‘yinda ularga e’tirozim yo‘q.

"Istern" bu bosqichga yetib kelguncha ko‘p mehnat qildi. Guruhdan chiqishimizni hech kim kutmagandi. "So‘g‘diyona"ga qarshi bahsda fantastik o‘yin namoyish etdik va ular bilan bir saviyada o‘ynay olishimiz mumkinligini isbotladik.

O‘yinchilar uchun bu juda yaxshi tajriba bo‘ldi. Ularda yuqori salohiyatni ko‘ryapman. Bu borada futbolchilar bilan ishlashda davom etaman", — dedi murabbiy.