O‘zbekiston Superligasining 18-turidan o‘rin olgan bahsda “Navbahor” safarda “So‘g‘diyona” (Jizzax) mehmoni bo‘ladi.

Mazkur klublar O‘zbekiston chempionatlarining  Cuperliga (oliy liga)sida o‘zaro 53 marta uchrashishgan. Ushbu o‘yinlarning 25 tasida “Navbahor”  g‘alaba qozongan bo‘lsa, “So‘g‘diyona” 21 ta bahsda zafar quchgan, 7 ta o‘yinda esa durang qayd etilgan. To‘plar nisbatidagi ko‘rsatkich 89-62, “Navbahor”foydasiga.

Namanganliklar o‘zaro o‘yinlarda 82 ochkoni qo‘lga kiritishgan bo‘lsa, jizzaxliklar hisobida 70 ochko mavjud. 

“So‘g‘diyona” – “Navbahor” klublari o‘rtasidagi o‘zaro uchrashuvlardagi eng yirik hisob 1996 yili qayd etilgan. O‘sha yili “lochinlar” Namanganda jizzaxliklar darvozasiga 7 ta javobsiz to‘p kiritishgandi.

Sermahsullik borasida esa 2000 va 2014 yillardagi uchrashuvlar tarixda qolgan.

E’tiborlisi, o‘sha o‘yinlarda darvozalarga to‘qqiztadan gol urilgan.

2000 yili Namanganda bo‘lib o‘tgan uchrashuvda mezbonlar 6:3 hisobida zafar quchishgan bo‘lsa, 2014 yili Jizzaxda o‘tkazilgan bahsda “So‘g‘diyona” 5:4 hisobida g‘alaba qozongandi.

Jizzaxda shu paytgacha bo‘lib o‘tgan 26 bahsning 19 tasida mezbonlar g‘alaba qozonib, 3 ta uchrashuvda durangga imzo chekishgan hamda 4 ta bahsda mag‘lubiyatga uchrashgan.

Ushbu jamoalarning 1-davrada Namanganda bo‘lib o‘tgan bahsida jizzaxliklar Shohruz Norxonov va Doniyor Abdumannopovning gollari evaziga 2:1 hisobida g‘alaba qozonishgandi. O‘sha o‘yinda “Navbahor”ning yagona goliga serbiyalik hujumchi Zoran Marushich mualliflik qilgandi.        

Eslatib o‘tamiz, “So‘g‘diyona” – “Navbahor” o‘yini 10 sentyabr kuni Jizzaxdagi “So‘g‘diyona” markaziy stadionida soat 20:00 da start oladi.