"Liverpul" va Angliya terma jamoasining sobiq himoyachisi Jeymi Karrager "qizillar"ning joriy mavsumdagi o‘yini haqida gapirdi.

Eslatib o‘tamiz, Premyer-liganing olti turidan so‘ng Yurgen Klopp shogirdlari to‘qqiz ochko jamg‘arib, turnir jadvalida yettinchi o‘rinni egallab, peshqadam “Arsenal”dan 6 ochko ortda qolmoqda. Bundan tashqari, kecha “qizillar” Chempionlar ligasi guruh bosqichi 1-tur uchrashuvida “Napoli”dan yirik (1:4) hisobda mag‘lubiyatga uchradi.

Karragerning so‘zlariga ko‘ra, uni "Liverpul"ning bitta mag‘lubiyati emas, balki ko‘proq global muammolar tashvishga solmoqda.

“Bu muammo faqat bugungi o‘yinda emas. Bu haqda unutish kerak. Meni ko‘proq savol qiziqtiradi: "Bu butun mavsum davom etadigan narsami?" Muvaffaqiyatli sikl shu bilan tugadimi?”, – dedi Karrager Sky Sports nashrida.

Shuningdek, sobiq futbolchi "mersisaydliklar" o‘yinlarni juda yomon boshlashini, doimo birinchi bo‘lib gol o‘tkazib yuborishini ta’kidladi.

"Liverpul" navbatdagi o‘yinini 10 sentyabr kuni "Vulverxempton"ga qarshi o‘tkazadi.