"Ливерпуль" ва Англия терма жамоасининг собиқ ҳимоячиси Жейми Каррагер "қизиллар"нинг жорий мавсумдаги ўйини ҳақида гапирди.

Эслатиб ўтамиз, Премьер-лиганинг олти туридан сўнг Юрген Клопп шогирдлари тўққиз очко жамғариб, турнир жадвалида еттинчи ўринни эгаллаб, пешқадам “Арсенал”дан 6 очко ортда қолмоқда. Бундан ташқари, кеча “қизиллар” Чемпионлар лигаси гуруҳ босқичи 1-тур учрашувида “Наполи”дан йирик (1:4) ҳисобда мағлубиятга учради.

Каррагернинг сўзларига кўра, уни "Ливерпул"нинг битта мағлубияти эмас, балки кўпроқ глобал муаммолар ташвишга солмоқда.

“Бу муаммо фақат бугунги ўйинда эмас. Бу ҳақда унутиш керак. Мени кўпроқ савол қизиқтиради: "Бу бутун мавсум давом этадиган нарсами?" Муваффақиятли цикл шу билан тугадими?”, – деди Каррагер Sky Sports нашрида.

Шунингдек, собиқ футболчи "мерсисайдликлар" ўйинларни жуда ёмон бошлашини, доимо биринчи бўлиб гол ўтказиб юборишини таъкидлади.

"Ливерпуль" навбатдаги ўйинини 10 сентябр куни "Вулверхэмптон"га қарши ўтказади.