Londonning “Chelsi” klubini qabul qilib olgan 47 yoshli britaniyalik mutaxassis Grem Potter yangi klubida muhim shartnomaga erishdi, deb xabar bermoqda The Telegraph.
Manbaga ko‘ra, umumiy hisobda "aristokratlar" bilan 5 yillik shartnomasi davomida Potter 69 million yevro ishlab oladi. Uning yillik maoshi taxminan 13,8 million yevroni tashkil qiladi. Ayni vaqtda mutaxassisni qo‘lga kiritish uchun "Chelsi" Potterning sobiq jamoasi "Brayton"ga 17,2 million yevro miqdorida tovon puli to‘lagan. Ma’lum qilinishicha, Grem global obro‘ga ega bo‘lgan munosib sport direktorini izlash bilan shug‘ullanadi va yangi sport direktor bilan 2022 yilgi jahon chempionatigacha shartnoma imzolanadi.
Potter "Brayton"ni 2019 yilning may oyidan beri boshqarib kelmoqda. Uning faoliyati davomida "Brayton" Angliya chempionatida 16, 15 va 9-o‘rinlarni egallagan, Angliya va Liga kuboklarida esa 1/8 finaldan nariga o‘ta olmadi.
