Лондоннинг “Челси” клубини қабул қилиб олган 47 ёшли британиялик мутахассис Грэм Поттер янги клубида муҳим шартномага эришди, деб хабар бермоқда The Telegraph.
Манбага кўра, умумий ҳисобда "аристократлар" билан 5 йиллик шартномаси давомида Поттер 69 миллион евро ишлаб олади. Унинг йиллик маоши тахминан 13,8 миллион еврони ташкил қилади. Айни вақтда мутахассисни қўлга киритиш учун "Челси" Поттернинг собиқ жамоаси "Брайтон"га 17,2 миллион евро миқдорида товон пули тўлаган. Маълум қилинишича, Грэм глобал обрўга эга бўлган муносиб спорт директорини излаш билан шуғулланади ва янги спорт директор билан 2022 йилги жаҳон чемпионатигача шартнома имзоланади.
Поттер "Брайтон"ни 2019 йилнинг май ойидан бери бошқариб келмоқда. Унинг фаолияти давомида "Брайтон" Англия чемпионатида 16, 15 ва 9-ўринларни эгаллаган, Англия ва Лига кубокларида эса 1/8 финалдан нарига ўта олмади.
