Luka Modrich 37 yoshga to‘lishi munosabati bilan klub kanaliga intervyu berdi. Xorvatiyalik yarim himoyachi "Qirollik klubi" uchun mavsumning muvaffaqiyatli boshlanishini tahlil qildi va o‘zining ajoyib formasi haqida gapirdi:

“Odamlar doim mendan sirim nimada, deb so‘rashadi, lekin men sizga nima deyishni bilmayman. Bu tabiiy narsa. Men kuniga deyarli 24 soat futbol va futbol tufayli yashayman. Menimcha, bu juda muhim.

Men qilayotgan ishimni yaxshi ko‘raman va o‘z kasbimdan to‘liq zavqlanaman, bu darajada va juda ko‘p talab qilinadigan klubda qancha vaqt ishlay olishingizni hech qachon bilmaysiz. Men mashg‘ulotlar va o‘yinlardan zavq olishga harakat qilaman. Bularning barchasi yillar davomida yaxshi holatda bo‘lishga
yordam beradi".

Iqtidor haqida

“Xudo menga iste’dod berganidan juda minnatdorman, lekin siz hali ham ko‘p mehnat qilishingiz va o‘zingizni qilayotgan ishingizga, kasbingizga to‘liq bag‘ishlashingiz kerak. Mehnatsiz iste’dod natija bermaydi. Kasbingda muvaffaqiyatga erishish uchun ko‘p mehnat qilish va uni yaxshi bajarish kerak”.

Kundalik tartib haqida

“Xo‘sh, bugun men bir soat erta keldim va odatda nonushta qilaman. Men fizioterapevtlar bilan ishlayman va keyin mashq qilaman. Keyinchalik, o‘zimni qanday his qilishimga qarab, men fizioterapevtlar bilan ishlashda davom etaman. Keyin oilam va bolalarim bilan vaqt o‘tkazish uchun uyga qaytaman. Men ularni maktabdan olib ketaman va ko‘p kunlarim shunday o‘tadi."

Markaziy yarim himoya haqida

“Bu yilni juda yaxshi boshladik va bizda kuchli jamoa bor. Yarim himoyada biz muhim o‘yinchi Kazemironi yo‘qotdik, ammo bizda uning o‘rnini bosadigan va yaxshi ish qiladigan boshqa ko‘plab yaxshi o‘yinchilar bor. Tchuameni juda yaxshi moslashdi. Bu Kamavinganing Madriddagi ikkinchi yili va u birinchi yilni ajoyib o‘tkazdi.

Kroos anchadan beri shu yerda. Valverde har qanday pozisiyada ham o‘z vazifalarini a’lo darajada bajaradi. Sebalyos jamoaga katta yordam beradi. Biz bu pozisiyadan xavotirda emasmiz”, deya so‘zni tugatadi Modrich.