Premyer-liganing sakkizinchi turidan o‘rin olgan o‘yinlar katta ehtimol bilan taqvim bo‘yicha o‘tkaziladi.
Angliya chempionatining yettinchi tur o‘yinlari Yelizaveta II vafoti sababli qoldirildi. 19 sentyabr, dushanba kuni bo‘lib o‘tadigan Buyuk Britaniya qirolichasining dafn marosimini tashkil etish uchun katta polisiya kuchlari talab qilinishi sababli 8-tur o‘yinlari boshqa sanalarga ko‘chirilishi mumkinligi xabar qilingandi.
Angliya futbol assosiasiyasi (FA) futbol ligalaridagi keyingi barcha o‘yinlar belgilangan sanalarda o‘tkazilishi mumkinligini ma’lum qildi. Istisno dushanba kuniga rejalashtirilgan o‘yinlar bo‘ladi (bu kunda Premyer-liga o‘yinlari bo‘lmaydi). FAning ta’kidlashicha, o‘yinlar qanday o‘tkazilishi bo‘yicha yakuniy qaror mahalliy hokimiyat organlarida qoladi.
Tashkilot ligalar va klublarga Yelizaveta II xotirasiga bir daqiqalik sukut saqlashni, shuningdek, iloji boricha qora motam tasmalaridan foydalanishni tavsiya qildi.
Premyer-liganing 8-tur uchrashuvlari 16-18 sentyabr kunlariga belgilangan.
