AGMK bosh murabbiyi Mirjalol Qosimov Superliganing 19-turi doirasida bo‘lib o‘tgan "Paxtakor"ga qarshi o‘yin borasida o‘z fikrini bildirib o‘tdi.

«Qiziqarli o‘yin bo‘ldi, afsus mag‘lub bo‘ldik. Biz uchun juda muhim o‘yin edi, shunga mos tayyorgarlik ko‘rgandik. G‘alaba qozonsak chempionlik uchun imkoniyatimiz saqlanib qolardi. Uchrashuvni yomon boshlaganimiz yo‘q, birinchi bo‘limda yaxshi vaziyatlarga ega bo‘ldik.

Ikkinchi bo‘limda Boake o‘z vaziyatidan foydalanganda, balki natija boshqacha bo‘lardi. "Paxtakor" vaziyatlardan unumli foydalanadi. Bu kabi jamoalar xatolarni kechirmaydi, bugun shu fikr o‘z tasdig‘ini topdi. Mehmonlarni g‘alaba bilan tabriklayman. Endi qisqa muddatli tatilga chiqamiz. Xulosa chiqarib ishlashda davom etamiz. Har qanday musobaqada faqat yuqori o‘rin va yuqori natija uchun kurashamiz. Endi faqat kubokka e’tibor qilib, chempionatda shunchaki qatnashmaymiz. Medallar uchun hali kurash davom etadi. Men doim barcha musobaqalarda yuqoriga qarab intilaman. Afsus, bugun boshqa natija kutgandik. Yaxshi vaziyatlar bo‘ldi. Bu futbol, gol urmasang juda qiyin», — dedi Qosimov.