Megayulduzlardan biri bo‘lgan Lionel Messi dunyoning eng qimmat va eksklyuziv uylarida istiqomat qiladi. Bizningcha, siz ham 524 million funtlik boyliklaringiz bo‘lsa, shunday uylarda yashashni odat qilgan bo‘lardingiz. Argentinalik futbolchi ayni damda "PSJ" safida harakat qilmoqda. Messi bir yildan buyon Parijning eng qimmat tumanlaridan birida ijarada yashaydi. Uyning ijara haqi oyiga 18 ming funtni tashkil etadi. Yillar davomida Leo "Barselona" hamda Mayami shaharlarida o‘zi uchun uylar qurdi. Yaqindagina esa bu ro‘yxatga Ibisa hamda Rosario shaharlari ham qo‘shildi. Quyida Messining o‘sha shaharlardagi uylari haqida gap boradi.
Barselona
Hammasi Barselona shahridan boshlangan. Messi Kataloniyada qirolga aylangandi. Uning ilk uyi ham o‘sha yerda joylashgan. Shaharning eng boy kazo-kazolari joylashgan yeridan Messi uy olgan edi. U dengiz bo‘yida joylashgan bo‘lib, butun qirg‘oqni osonlik bilan ko‘rish mumkin. Shuningdek, Messining uyi joylashgan hudud osmonida uchoq harakat qila olmaydi. Eng asosiysi esa uy "Kamp Nou"ga juda yaqin joylashgan. Messi yillar davomida ayoli va uch farzandi bilan o‘sha uyda yashagan edi. Uy o‘z ichiga katta hovli, futbol maydonchasi, basseyn, ichki trenajor zali hamda qumloqni olgan. Uyning umumiy qiymati 5,5 million funtni tashkil etadi.
Mayami
2020 yilda Messi AQSHdan koshona xarid qiladi. Uning yangi uyi Mayami shahrida joylashgan edi. Bu voqea Messining "Inter Mayami" jamoasiga o‘tishi bilan bog‘liq mish-mishlarni alangalatib yuborgan. Plyaj yaqinidagi uyda 4 ta yotoqxona, 4 ta vanna, basseyn, SPA, fitness zali, yoga studiosi, bolalar o‘yin maydonchasi hamda shampan bari mavjud. Uning umumiy qiymati esa 5 million funtga baholangan.
Ibisa
Messining uy borasidagi eng so‘nggi xaridi bo‘lgan koshona O‘rtayer dengizida, Balear orollarida joylashgan. Uyning narxi 9,5 million funt ekani aytiladi. Ammo bunda ozgina muammo mavjud. Chunki Messining yangi uyiga egalik qilish uchun mahalliy hukumat vakillari hali sertifikat taqdim etmagan. Shunday bo‘lsada, uy Messi didiga moslanib qayta qurilmoqda. Keyingi yozga qadar bu ishlar yakun topishi aytilgan. Messi esa oilasi bilan ta’tilni Ibisada, ilk bor yangi uyida o‘tkazishi mumkin bo‘ladi.
Rosario
Vatan qayda bo‘lsa, ko‘ngil ham o‘sha yerda, deyishadi. Garchand, o‘z orzulari yo‘lida 13 yoshidayoq Argentinani, Rosarioni tashlab ketishga majbur bo‘lgan bo‘lsada, Messi doimo u yerga hurmat va mehr bilan qaragan. Aytishlaricha, Messi o‘zi tug‘ilib-o‘sgan shahardan umumiy qiymati 3 million funtga teng bo‘lgan, "The Fortress" deb ataluvchi koshonani sotib olgan. Argentinadagi uy 20-25 ta xonadan tashkil topgan. Unda yirik uy kinoteatri, to‘la jihozlangan trenajor zali va boshqa qulayliklar mavjud. Shuningdek, uyning tagida, yerto‘lasida 15 ta mashina sig‘adigan maxsus garaj ham mavjud. Messi ushbu uyni sotib olganidan keyin, otasi Xorxe Messining nomiga o‘tkazib qo‘ygan. Bir kun kelib, "Barselona" afsonasi futbolni tark etsa, katta ehtimol bilan o‘sha uyda butun oilasi bilan yashashi mumkin bo‘ladi.
ISMATOV J.
