Superliganing 20-turini Bekobodning “Metallurg” jamoasi safarda – Navoiyda “Qizilqum”ga qarshi o‘tkazadi.
Raqib ancha jiddiy va so‘nggi yillarda “Metallurg” uchun noqulay jamoa bo‘lib qolmoqda.
Xususan, oxirgi ikki mavsumda “Qizilqum” Bekoboddan bir xil – 2:1 hisobidagi g‘alaba bilan qaytgan.
Toshkent viloyati jamoasi uchun Bekoboddagi bu yilgi to‘qnashuv kuchlilar safidagi yubiley – 700 o‘yin bo‘ldi. Bahs boshidanoq hududiy tashabbusni o‘z qo‘liga olib, 26-daqiqada hisobni ochib olgan bekobodliklar nihoyat ko‘ngilsiz an’anaga barham beradigandek, g‘alabaga juda yaqin kelishgandi. Biroq hakam tomonidan ikkinchi taymga kompensasiya vaqti qo‘shib berilgan lahzalarda tezkor qarshi hujumni o‘tkazib yuborgan “Metallurg” yana ochko yo‘qotdi va durang bilan kifoyalandi – 1:1.
Umuman esa “Metallurg” va “Qizilqum” shu kungacha O‘zbekiston chempionatlarida 45 marta kuch sinashgan. Mazkur o‘yinlarning 15 tasi “Metallurg” g‘alaba qozongan. 12 ta uchrashuvda kuchlar teng kelgan. 18 ta o‘yinda esa “Qizilqum” jamoasining qo‘li baland kelgan. Kiritilgan va o‘tkazib yuborilgan to‘plar farqi 61:58, vohaliklar foydasiga.
“Metallurg” bu raqibini ikki marta 4:1 hisobida dog‘da qoldirgan (2006, 2019). “Qizilqum” esa bitta uchrashuvda bekobodliklar darvozasiga javobsiz beshta to‘p (0:5, 2006) yo‘llagan.
Ushbu jamoalarning Navoiyda o‘tkazilgan uchrashuvlarida mezbonlar katta ustunlikka ega: 11 ta g‘alaba, 6 ta durang, 3 ta mag‘lubiyat, to‘plar nisbati – 31:15.
Quyida mazkur jamoalarning Navoiy shahrida bo‘lib o‘tgan so‘nggi oltita uchrashuvida qayd etilgan natijalar bilan tanishing:
27.11.2021 “Qizilqum” – “Metallurg” – 1:3
24.11.2020 “Qizilqum” – “Metallurg” – 1:0
29.10.2019 “Qizilqum” – “Metallurg” – 1:1
05.05.2018 “Qizilqum” – “Metallurg” – 1:2
19.11.2017 “Qizilqum” – “Metallurg” – 2:1
28.05.2016 “Qizilqum” – “Metallurg” – 1:1
