FIFA kunlarida "Paxtakor"ning aksariyat futbolchilari MTJ va OTJ safida Janubiy Koreya davlatida o‘rtoqlik o‘yinlarini o‘tkazib kelishdi.
"Metallurg" bilan Qibraydagi bazada nazorat o‘yini tashkil qilindi. 3:1 hisobida "Paxtakor"ning g‘alabasi bilan yakunlangan o‘yindan so‘ng, toshkentliklar futbolchisi Muhammadali O‘rinboyevga o‘z fikrlari bilan o‘rtoqlashdi.
"Bu o‘yin men uchun boshlang‘ich tarkibda tushganim bilan ahamiyatli bo‘ldi. Ko‘plab akalarim terma jamoalarga ketganligi uchun nazorat uchrashuvidagi imkoniyat meni xursand qildi. Qancha ko‘p o‘yinlarda maydonga tushsam, tabiiyki, shuncha ko‘p tajribam oshib boraveradi. Quvonarlisi shundaki, bu yerda katta futbolchilar menga raqobatchi sifatida emas, ukaga qaragandek munosabatdalar. Shuning uchun ham bugungi o‘yinda qiynalmadim", - deydi 17 yoshli futbolchi.
- FIFA kunlari ham o‘z yakuniga yetdi, oldinda Sizlarni muhim bahslar kutib turibdi...
- To‘g‘ri aytasiz, chempionatda "Nasaf"ga qarshi "oltin" o‘yinlardan biri bizni kutib turibdi. "Metallurg" bilan ham aynan shuning uchun bahs o‘tkazdik. Chempionlikni maqsad qilgan jamoa faqat g‘alaba haqida o‘ylashi kerak. Bu yilgi chempionatdan kelib chiqadigan bo‘lsak, hali qiziqarli va kuchli o‘yinlar oldinda deb aytishim mumkin.
- Avvalgi mavsumlarga qaraganda bu yil ko‘proq o‘yin amaliyotiga ega bo‘lyapsiz?
- Superligada debyut golimni shu mavsumda urishni istayman. Menga ishonch bildirayotgan Maksim Aleksandrovichga katta rahmat aytaman. Umuman olganda, "Paxtakor"ga kelib yomon murabbiylarga duch kelmaganman. Har bir qadamimda ularning mehnati yotibdi. Oldimizda 7ta o‘yin qoldi, mana shu o‘yinlarda ham maydonga tushib jamoamizga foyda keltirish haqida o‘ylayaman.
