"Barselona" qishda Jerar Pike va Xordi Albaning jamoani tark etishini istamoqda.
Avgust oyida “Barselona” prezidenti Joan Laporta Pike va Buskets bilan uchrashib, yordam so‘ragan edi. Iqtisodiy dastaklar faollashganiga qaramay, Kataloniya klubi moliyaviy feyr-pley qoidalariga rioya qilishda muammolarga duch keldi.
Shu munosabat bilan Laporta jamoaning eng ko‘p maosh oluvchi futbolchilari Pike va Busketsdan maoshlarni klubning hozirgi voqeligiga moslashtirishni so‘radi. Futbolchilar "Barsa"ga yordam berishga tayyor edi. Ular hatto yangi shartnomalar imzolashga ham kelishgan. Laporta muzokaralar natijalaridan juda mamnun edi.
Biroq oradan bir necha kun o‘tib, "Barsa" Pike va Buskets bilan kelishilgan shartlar asosida yangi shartnomalar tuzishi kerak bo‘lganida, futbolchilar vakillari buni rad etishdi. Natijada "Barselona" Pyer-Emerik Obameyangni sotishga majbur bo‘ldi.
Laporta juda g‘azablandi va hafsalasi pir bo‘ldi, chunki keyingi bir yarim yil ichida "Barsa" Pike, Buskets va Xordi Albaga jami taxminan 200 million yevro to‘lashi kerak. Shu munosabat bilan "Barsa" prezidenti yaqin oylarda bu futbolchilardan qutulishni maqsad qilgan, deb yozadi Diario Sport.
Buskets masalasida buning iloji bo‘lmaydi, chunki uning shartnomasi 2023 yilning 30 iyunida tugaydi. Yarim himoyachi "Barselona"ni tekinga tark etish niyatida.
Shartnomalari 2024 yilning yoziga qadar davom etadigan Pike va Albadan klub qishda qutulish uchun bor kuchini sarflaydi, ammo "Barsa" prezidenti va boshqa klub rahbarlari bu juda qiyin vazifa ekanini tushunishadi.
