"Барселона" қишда Жерар Пике ва Хорди Альбанинг жамоани тарк этишини истамоқда.
Август ойида “Барселона” президенти Жоан Лапорта Пике ва Бускетс билан учрашиб, ёрдам сўраган эди. Иқтисодий дастаклар фаоллашганига қарамай, Каталония клуби молиявий фейр-плей қоидаларига риоя қилишда муаммоларга дуч келди.
Шу муносабат билан Лапорта жамоанинг энг кўп маош олувчи футболчилари Пике ва Бускетсдан маошларни клубнинг ҳозирги воқелигига мослаштиришни сўради. Футболчилар "Барса"га ёрдам беришга тайёр эди. Улар ҳатто янги шартномалар имзолашга ҳам келишган. Лапорта музокаралар натижаларидан жуда мамнун эди.
Бироқ орадан бир неча кун ўтиб, "Барса" Пике ва Бускетс билан келишилган шартлар асосида янги шартномалар тузиши керак бўлганида, футболчилар вакиллари буни рад этишди. Натижада "Барселона" Пьер-Эмерик Обамеянгни сотишга мажбур бўлди.
Лапорта жуда ғазабланди ва ҳафсаласи пир бўлди, чунки кейинги бир ярим йил ичида "Барса" Пике, Бускетс ва Хорди Альбага жами тахминан 200 миллион евро тўлаши керак. Шу муносабат билан "Барса" президенти яқин ойларда бу футболчилардан қутулишни мақсад қилган, деб ёзади Diario Sport.
Бускетс масаласида бунинг иложи бўлмайди, чунки унинг шартномаси 2023 йилнинг 30 июнида тугайди. Ярим ҳимоячи "Барселона"ни текинга тарк этиш ниятида.
Шартномалари 2024 йилнинг ёзига қадар давом этадиган Пике ва Альбадан клуб қишда қутулиш учун бор кучини сарфлайди, аммо "Барса" президенти ва бошқа клуб раҳбарлари бу жуда қийин вазифа эканини тушунишади.
