"Milan" bosh murabbiyi Stefano Pioli jamoasining Italiya chempionati 8-turi doirasidagi "Empoli" ustidan qozonilgan g‘alaba (3:1) haqida fikr bildirdi.
“Rossonerilar” 79-daqiqada hisobni ochgan bo‘lsa, 90+1-daqiqada javob golini o‘tkazib yubordi. Shunga qaramay, milanliklar 90+3 va 90+6-daqiqalarda kiritilgan gollar evaziga g‘alabani qo‘lga kiritdi.
“Bu juda g‘alati, ammo shiddatli o‘yin bo‘ldi. Biz oldinroq gol urishimiz kerak edi, ammo jarohatlar tufayli o‘yinni qiyin o‘tkazdik. Shunga qaramay, biz hamma narsani tuzatishga muvaffaq bo‘ldik. Bu jamoaviy ruhning g‘alabasi edi. Bu jamoaviy g‘alaba, lekin "Milan" har doim shunday g‘alaba qozonadi. Biz birga o‘sishni va birgalikda muvaffaqiyat qozonishni istaymiz", - deya Pioli so‘zlarini keltiradi Football Italia.
"Milan" 17 ochko bilan Italiya chempionati turnir jadvalida uchinchi o‘rinda bormoqda. Keyingi turda jamoa o‘z maydonida "Yuventus"ni qabul qiladi, o‘yin 8 oktyabr kuni bo‘lib o‘tadi.
