"Милан" бош мураббийи Стефано Пиоли жамоасининг Италия чемпионати 8-тури доирасидаги "Эмполи" устидан қозонилган ғалаба (3:1) ҳақида фикр билдирди.
“Россонерилар” 79-дақиқада ҳисобни очган бўлса, 90+1-дақиқада жавоб голини ўтказиб юборди. Шунга қарамай, миланликлар 90+3 ва 90+6-дақиқаларда киритилган голлар эвазига ғалабани қўлга киритди.
“Бу жуда ғалати, аммо шиддатли ўйин бўлди. Биз олдинроқ гол уришимиз керак эди, аммо жароҳатлар туфайли ўйинни қийин ўтказдик. Шунга қарамай, биз ҳамма нарсани тузатишга муваффақ бўлдик. Бу жамоавий руҳнинг ғалабаси эди. Бу жамоавий ғалаба, лекин "Милан" ҳар доим шундай ғалаба қозонади. Биз бирга ўсишни ва биргаликда муваффақият қозонишни истаймиз", - дея Пиоли сўзларини келтиради Football Italia.
"Милан" 17 очко билан Италия чемпионати турнир жадвалида учинчи ўринда бормоқда. Кейинги турда жамоа ўз майдонида "Ювентус"ни қабул қилади, ўйин 8 октябрь куни бўлиб ўтади.
