"Vulverxempton" jamoasi bosh murabbiyi Bruno Laje bilan xayrlashishni o‘ylamoqda.

"Bo‘rilar" kecha "Vest Xem"ga qarshi o‘yinda 2:0 hisobida mag‘lub bo‘lib, Premyer-liga turnir jadvalining xavfli xududiga tushib qoldi.

"Bo‘rilar" bu mavsumda Premyer-ligadagi dastlabki sakkizta o‘yinning faqat bittasida g‘alaba qozonishdi. Bundan tashqari, Laje shogirdlari atigi uchta gol urishdi.

Klub rahbariyati yozda transferlar uchun 100 million funt sarflab, mavsumni yomon boshlaganidan hafsalasi pir bo‘ldi va 15 oy oldin tayinlangan Lajeni ishdan bo‘shatish haqida o‘ylamoqda.

TalkSPORT nashri xabariga ko‘ra, nafaqat “Vulverxempton” rahbariyati va muxlislari, balki jamoa futbolchilarida ham 46 yoshli portugaliyalik murabbiyning mashg‘ulot uslublari haqida ko‘proq savollar paydo bo‘lmoqda.

Qo‘shimcha o‘rnida shuni aytish kerakki, omadsiz natijalar seriyasi o‘tgan mavsumga to‘g‘ri keladi. "Bo‘rilar" APLdagi so‘nggi 15 o‘yinning faqat bittasida g‘alaba qozongan, 9 ta mag‘lubiyat alamini totib ko‘rgan.