Superliga 20-turi doirasidagi «Dinamo» - «Olimpik» (1:1) uchrashuvidan keyin mehmonlar bosh murabbiyi Temur Kapadze fikrlarini bildirdi.

- Samarqanddagi o‘yinda qiyin bo‘lishi aniq edi. Chunki «Dinamo» oxirgi o‘rinda yurgan bo‘lsa-da, aslida qanday jamoa ekanini bilamiz. Tarkibida yaxshi saviyadagi o‘yinchilari bor. Yaxshi o‘yin bo‘ldi, g‘alaba qozonganimizda yaxshiroq bo‘lardi. Samarqand jamoasi ikkinchi bo‘limda ancha zich himoyalandi. Bu bizga qiyinchilik tug‘dirdi. Umuman olganda yomon emas.

Hammamiz bilamiz, Vadim Karlenovich odatda to‘p bilan ko‘proq o‘ynaydigan, hujum va pressing qiladigan, o‘yinni nazorat qiladigan o‘yin quradi. Bu murabbiy qo‘l ostida o‘ynaganman, to‘g‘risi shaxsan men Vadim Abramov jamoasi himoyaviy o‘ynaganini eslolmayman. Bugun «Dinamo» ikkinchi bo‘limda asosan himoyalandi. Balki hozirgi vaziyatdan kelib chiqib, bir ochko ham ularga muhimdir.

Ha, birinchi davrada ham o‘zaro 1:1 hisobi qayd etilgandi. Ammo 1-davradagi «Dinamo» va 2-davradagi «Dinamo» o‘rtasida ham farq bor. Tarkib ham, murabbiylar ham o‘zgargan. Bizning jamoamiz ham 1-davradagidan ko‘ra o‘sishga erishdi. «Dinamo» yomon jamoa emas, keyingi o‘yinlarda ularga omad tilayman, - deydi Temur Kapadze uchrashuvdan keyingi matbuot anjumanida.