Ispaniya hukumati 2030 yilgi jahon chempionatini o‘tkazish bo‘yicha Ispaniya va Portugaliyaning qo‘shma arizasiga Ukrainaning qo‘shilishi ehtimolini qo‘llab-quvvatladi, deb yozadi “TASS” qirollik vazirlar mahkamasi vakili Izabel Rodriges bayonotiga tayanib.
"Hukumat Ukrainani bizning nomzodimizga qo‘shishni qo‘llab-quvvatlaydi", - dedi u.
The Times nashrining yozishicha, Ukraina, Ispaniya va Portugaliya 2030 yilgi jahon chempionati mezbonligi uchun birgalikda ariza topshiradi.
Bu haqda rasman Ispaniya va Portugaliya futbol federasiyalari rahbarlari 5 oktyabr kuni UYEFA shtab-kvartirasida bo‘lib o‘tadigan matbuot anjumanida ma’lum qilishlari kerak. Shu bilan birga, Ukraina guruh bosqichining bir nechta o‘yinlarini o‘tkazishi mumkinligi kutilmoqda.
Bundan tashqari, Argentina, Urugvay, Paragvay va Chili, shuningdek, Misr, Gresiya va Saudiya Arabistoni turnir mezbonlik qilish huquqiga da’vogarlik qilmoqda.