O‘zbekiston futzal milliy terma jamoasi bosh murabbiyi Bahodir Ahmedov Osiyo chempionatining chorak finalida bo‘lib o‘tgan Kuvaytga qarshi o‘yindan so‘ng matbuot anjumanida ishtirok etdi.

"Kuvayt bizga qarshi juda yaxshi qarshilik ko‘rsatdi. O‘yin og‘ir kechdi. Biz o‘z imkoniyatlarimizdan unumli foydalanganimiz uchun g‘alabaga erishdik.

Ha, ba’zi vaziyatlardan foydalana olmadik. Bizga o‘sha pallada sovuqqonlik yetishmadi. Kuvaytga qarshi mezbon jamoa muxlislari qarshisida o‘ynaganimiz uchun yigitlarda hayajon bo‘ldi. Bundan tashqari, bitta o‘yindan iborat pley-off bahsining bosimi ham sezildi.

Yigitlarga hayajonni bosib olib, aqlli o‘yin namoyish etish kerakligini tushuntirdik. Shundan keyin yigitlar ko‘rsatmalariga yaxshi amal qilishdi va g‘alaba qozondik.

Yaponiya — Osiyoning eng yaxshi jamoalaridan biri. Yarim finalda juda ham qiyin bo‘ladi. Bu jamoaning o‘yinlarini tomosha qildik. Jamoa yaxshi o‘yin ko‘rsatmoqda. Bu jamoa safida individual jihatdan kuchli futzalchilari bor. Ertadan boshlab yarim final bahsiga tayyorgarlikni boshlaymiz", — dedi Bahodir Ahmedov.