Ўзбекистон футзал миллий терма жамоаси бош мураббийи Баҳодир Аҳмедов Осиё чемпионатининг чорак финалида бўлиб ўтган Кувайтга қарши ўйиндан сўнг матбуот анжуманида иштирок этди.

"Кувайт бизга қарши жуда яхши қаршилик кўрсатди. Ўйин оғир кечди. Биз ўз имкониятларимиздан унумли фойдаланганимиз учун ғалабага эришдик.

Ҳа, баъзи вазиятлардан фойдалана олмадик. Бизга ўша паллада совуққонлик етишмади. Кувайтга қарши мезбон жамоа мухлислари қаршисида ўйнаганимиз учун йигитларда ҳаяжон бўлди. Бундан ташқари, битта ўйиндан иборат плей-офф баҳсининг босими ҳам сезилди.

Йигитларга ҳаяжонни босиб олиб, ақлли ўйин намойиш этиш кераклигини тушунтирдик. Шундан кейин йигитлар кўрсатмаларига яхши амал қилишди ва ғалаба қозондик.

Япония — Осиёнинг энг яхши жамоаларидан бири. Ярим финалда жуда ҳам қийин бўлади. Бу жамоанинг ўйинларини томоша қилдик. Жамоа яхши ўйин кўрсатмоқда. Бу жамоа сафида индивидуал жиҳатдан кучли футзалчилари бор. Эртадан бошлаб ярим финал баҳсига тайёргарликни бошлаймиз", — деди Баҳодир Аҳмедов.