“Barselona” rahbariyati Chempionlar ligasining “Inter”ga qarshi o‘yinidagi hakamlik ustidan shikoyat qilish fikridan qaytdi, deb xabar beradi Sport.es.

Italiyaliklarning 1:0 hisobidagi g‘alabasi bilan yakunlangan o‘yindan so‘ng kataloniyaliklar UYEFAga shikoyat yuborishi xabar qilingandi.

"Barselona" rahbariyati ham bosh hakamning, ham VAR tizimi bilan ishlagan hakamning qarorlaridan norozi bo‘ldi. Ammo yakunda kataloniyaliklar shikoyat qilishdan bosh tortishdi.

Aytilishicha, klub ichidagi vaziyat muhokama qilinib, ularning pozisiyasini boshqacha tarzda yetkazishga qaror qilingan. Shu bilan birga, "Barselona" vaziyatga qanday ta’sir o‘tkazishni rejalashtirayotgani haqida hozircha xabar berilmagan.

O‘yin davomida bosh hakam "Barselona"ning golini hisoblamadi va yakunda milanliklar himoyachisining qo‘liga to‘p tekkaniga qaramay, "Inter" darvozasiga penalti belgilamadi.