Yaponiya futzal milliy terma jamoasi bosh murabbiyi Kenichiro Kogure Osiyo chempionatining yarim finalida bo‘lib o‘tgan O‘zbekistonga qarshi o‘yindan avval matbuot anjumanida ishtirok etdi.

"O‘zbekiston bizning azaliy raqibimiz. Men bu jamoaning bosh murabbiyi bilan ko‘p to‘qnash kelganman va uni yaxshi bilaman. Men ushbu murabbiy va mazkur jamoani to‘la hurmat qilaman. Biz ularni hurmat qilamiz, ammo biz o‘z maqsadimizga erishimiz kerak.

Finalga chiqish uchun maksimal konsentrasiya bilan o‘ynash lozim. Avvalgi natijalarga qaramasdan murabbiy sifatida o‘z shogirdlarimga, ularning iqtidori va mahoratiga ishonaman. Finalga chiqish uchun ular bor imkoniyatni ishga solishadi.

Yaponiya milliy chempionati o‘yinchilarning jismoniy holatini yaxshilashda yordam berdi. Ha, taqvim biz uchun oson bo‘lmadi. Ketma-ket qiyin uchrashuvlarni o‘tkazdik. Ammo men o‘yinchilarning kuchli jihatiga ishonaman.

Ruhiy jihatdan qiyin vaziyatdan chiqib ketdik. Tajriba jamoani jipslashtiradi. Finalga chiqa olishimiz mumkinligini his qilyapman", — dedi Kogure.