"Bunyodkor" bosh murabbiyi Ivan Boshkovich Superliganing 21-turi doirasida bo‘lib o‘tgan "Metallurg" klubiga qarshi o‘yindan so‘ng (2:1) o‘z fikrlari bilan o‘rtoqlashdi.

"Himoyada intizom bilan harakat qildik. Raqib standartlarda xavfli o‘yin namoyish etishini, bugungi bahs qiyin kechishini bilardik. Bunga tayyorgarlik ko‘rgandik. Futbolchilar ko‘rsatmalarimga amal qilishdi. Ha, xatolar ham bo‘ldi. Shunga qaramay, yigitlarni tabriklayman. Bu ularning g‘alabasi. Ular "Bunyodkor"ning asosiy tarkibida o‘ynashga loyiq ekanliklarini isbotlashmoqda. Men bunga shubha qilmagandim. Nasib qilsa, o‘zimizga mos bo‘lgan yuqori o‘rinlarga ko‘tarilamiz. G‘alabali yurishni davom ettirishga harakat qilamiz.

Asta-sekin o‘rinbosarlar safidagi o‘yinchilarni asosiy tarkibga jalb qilib boramiz. "Bunyodkor" safida faqat o‘z tarbiyalanuvchilari o‘ynashini istayman. Jadvalda yanada yuqoriroq o‘rinlarga ko‘tarilib olsak, ko‘proq yoshlarga imkon bera boshlaymiz.

Legionerlarni maydonga tushirmayotganimga ayrim sabablar bor. Ba’zi o‘yinchilar kasal bo‘lib qolishgan bo‘lsa, kimlardadir jarohat bor. Ular yaxshi formaga qaytishganidan keyin maydonga tushirishni rejalashtiryapman", — dedi Boshkovich.