Indoneziya polisiyasi 1 oktyabr kuni Kanjuruxan stadionida tartibsizliklar ro‘y berganda foydalanish muddati o‘tib ketgan ko‘zdan yosh oqizuvchi gazdan foydalanganini tan oldi. Shunga qaramay, polisiyachilar muddati o‘tib ketgan gaz odamni o‘ldirmasligini ta’kidlashmoqda, deb xabar bermoqda TEMPO.CO portali.

Polisiyachilar 1 oktyabr kuni "Arema" va "Persebaya" jamoalari uchrashuvida Kanjuruxan stadioniga chiqib ketgan futbol ishqibozlarini tarqatish uchun ko‘zdan yosh oqizuvchi gazdan foydalangan. Natijada odamlar orasida vahima va ur-yiqit kelib chiqqan. Voqea 131 kishining hayotdan ko‘z yumishiga sabab bo‘ldi, yuzlab ishqibozlar jarohat olgan.

Indoneziya polisiyasining jamoatchilik bilan aloqa bo‘yicha bo‘lim boshlig‘i, general Dedi Prasetyoning TEMPO.CO portaliga bayonot berishicha, ko‘zdan yosh oqizuvchi gazning foydalanish muddati tugasa, uning kimyoviy ta’sir kuchi ham pasayadi.

Prasetyoning qo‘shimcha qilishicha, mamlakat polisiyasining olib borgan tekshiruvlariga ko‘ra, stadionda ro‘y bergan fojia qurbonlari ko‘zdan yosh oqizuvchi gazdan emas, balki ur-yiqit paytida halok bo‘lgan.