"Mash’al" bosh murabbiyi Dilyaver Vaniyev Pro liganing navbatdagi turidan o‘rin olgan "Xorazm" (2:3) uchrashuvidan so‘ng fikrlari bilan o‘rtoqlashdi.

— Muvaffaqiyatsizlikka uchradik. Bu ancha vaqtdan beri kuzatilmoqda. Yigitlar bosim ostida harakat qilishmoqda. Tayyorgarlik jarayoni bo‘yicha hech qanday muammo yo‘q. Rahbariyat hamma sharoitlarni yaratib beryapti. Yordamchim bilan bunga nima sabab bo‘layotganini aniqlay olmayapmiz.  Superligaga chiqish imkoniyatimizni yo‘qotib bo‘lganmiz. Ammo har bir bahsda munosib o‘ynashga intilamiz. Himoyadagi kichik xatolar to‘plarni darvozamizdan olib chiqishimizga olib keldi.

— Bugun asosan yoshlarga imkoniyat taqdim etdingiz. Ularda hayajon borligi va tajribasizlik sezilib qoldi. Klub futbolchisi jamoa libosini hurmat qilishi kerak. Bugun sardor sifatida maydonga tushgan futbolchi klub ramzi tushirilgan bog‘ichni otib yubordi. Shu taraflama sardorlikka loyiq emasligi ko‘rinib qoldi...
— Biz uning yetakchilik qobiliyatini inobatga olib, sardor sifatida maydonga tushirgandik. Uning qo‘pol xatosi tufayli gol o‘tkazib yubordik. Bugun Samandarning kuni emasdi. Klub emblemasini nafaqat u, balki ixtiyorimizdagi barcha futbolchilar hurmat qilishi lozim. Bu bo‘yicha albatta gaplashamiz. Bizda mavsum boshidan buyon markaziy himoyada muammo sezilmoqda. Hozirgacha buni to‘g‘rilay olmayapmiz. Hamma muxlislardan yomon ishtirok uchun uzr so‘raymiz.