"Машъал" бош мураббийи Дилявер Ваниев Про лиганинг навбатдаги туридан ўрин олган "Хоразм" (2:3) учрашувидан сўнг фикрлари билан ўртоқлашди.

— Муваффақиятсизликка учрадик. Бу анча вақтдан бери кузатилмоқда. Йигитлар босим остида ҳаракат қилишмоқда. Тайёргарлик жараёни бўйича ҳеч қандай муаммо йўқ. Раҳбарият ҳамма шароитларни яратиб беряпти. Ёрдамчим билан бунга нима сабаб бўлаётганини аниқлай олмаяпмиз.  Суперлигага чиқиш имкониятимизни йўқотиб бўлганмиз. Аммо ҳар бир баҳсда муносиб ўйнашга интиламиз. Ҳимоядаги кичик хатолар тўпларни дарвозамиздан олиб чиқишимизга олиб келди.

— Бугун асосан ёшларга имконият тақдим этдингиз. Уларда ҳаяжон борлиги ва тажрибасизлик сезилиб қолди. Клуб футболчиси жамоа либосини ҳурмат қилиши керак. Бугун сардор сифатида майдонга тушган футболчи клуб рамзи туширилган боғични отиб юборди. Шу тарафлама сардорликка лойиқ эмаслиги кўриниб қолди...
— Биз унинг етакчилик қобилиятини инобатга олиб, сардор сифатида майдонга туширгандик. Унинг қўпол хатоси туфайли гол ўтказиб юбордик. Бугун Самандарнинг куни эмасди. Клуб эмблемасини нафақат у, балки ихтиёримиздаги барча футболчилар ҳурмат қилиши лозим. Бу бўйича албатта гаплашамиз. Бизда мавсум бошидан буён марказий ҳимояда муаммо сезилмоқда. Ҳозиргача буни тўғрилай олмаяпмиз. Ҳамма мухлислардан ёмон иштирок учун узр сўраймиз.